۱۳۵۷ ایلی اردیبهشتین آخیرلاریدی، اوزاقدان یاخیندان انقیلابین سسی سمیری قولاقلارا چارپیردی. من اوچونجو کیلاسین امتحانلارین وئریب #قورخا_قورخا کارنامه‌نی آلیب ائوده گیزلتمیشدیم.

هله کورسونو ائودن گؤتورمه‌میشدیک

باهار یاغیشی ووراندا ائویمیز ایکی ساعات یاغیش‌دان سورادا دامچیللیردی آخی دامیمیز سوواغیدی.

او گئجه آخشام هامی یئقیشدیق کورسونون باشینا آبام (آنام) کورسو یورغانینین ده‌لیکلرین یامیردی و دوششکی سیریردی و دادام (آتام) اوردان بوردان سوز آچیردی.

بیردن دادام دئدی: آی خانیم دونن گئجه یوخودا گؤردوم کی خوراسانداییق، ایمام ریضا حرمینین ایچینده.

خلوتیدی بیر باش سنن گئتدیم صحنین ایچینه و آقانین ضریحین قوجاقلادیم بوشلامیردیم هئچ بیردن یوخوم آتدی.

ائله بیل باشیما سویوخ سو توکولدو گؤردوم کورسونون آلتیندا تر باسیب بیله‌می.

آبام گیردی دادامین سؤزونه دئدی: خب آقا بیزی ایستیب، اگر ریضا کارنامه‌سین آلیب قبول اولسا، بو ایل گئداخ مشهده قوم دان گئچاخ کی خانیم معصومه نین ده زیارتیندن یئرده قالمیاق.

من آللاهدان ایسته‌میش دئدیم: داداجان، آباجان من بوگون کارنامه‌نی آلمیشام، هامیسین‌دا دا قبولام، نومره‌لریم هامیسی میزاندی داداجان سن نامازین قیلانا من کارنامه‌نی تاپیب گتیررم.

ایلدیریم کیمی یئردن قالخیب آخدیم زیرزمییه اوردا کارنامه‌نی عمل جراحی ائله‌دیم هر نه ۲ واردی اولدو ۲۰، هر نه ۱ واریدی اولدو ۱۹… خلاصه آز قالدی معدیلیم ۲۰ نی آشا او یوزه!

کارنامه‌نی گتیریب داداما وئردیم دادام قوران ساوادیدی #زیقینا_زیقینا نمره‌لری اوخویوب تحویل وئردیم آنام اینانار اینانماز بیر #اوزرلیک دولاندیردی باشیما…

گئجه‌نی سیل سوپور ائلییب سرسهمانلانیب مشهده حاضیرلاندیق.

صاباح ناهاردا #موسوی_گاراجیندا میندیک اتورپوسا. ایمام ریضانین عشقینه یولدا بوتون چتینلیکلر بیزه نوش اولوردو نوش..

چوخ یادیمدا دئیل نئچه ساعات‌لار یولدایدیق و هانسی شهرلردن گئچیردیک، آنجاق یادیما گلیر کی تهران اطرافیندا اوتورپوس شام و نامازا ساخلادی.

دادا و آبا بیزی تاپشیردیلار بیر قوجا همسفره اؤزلری اندیلر نامازا

همسفرین باشینی کیچک باجیمنان قاتیب، من و کیچیک قارداشیم اتوبوسدان انیب اوتای بوتایا باش ووروردق، اورگیمیزدن گلر گلمز جیبیمیزده کی بئش قیرانلیغینان ایکی بستنی آلیب یالیا یالیا گیجالیردیق یاواش یاواش ایتمه‌گیمیزی حیس ائدیردیک، ال ایاغیمیز بالا بالا بویوردو، کیچک قارداشیما آغلاماق ال وئردی من‌ده بیر طرفدن بستنی یه بیر دیش ووروب سس سسه وئردیک.

گؤز یاشلاری، بورون سویو و بستنی‌نین شیرینلیگی دئینمیشدی بیری بیرینه…

قارداش یانیندا منه کیشیلیک حیسی ال وئردی دئدیم #قاغا آغلاما بیز اؤزوموزو تاپشیراق ایمام ریضایا اوزو بیزی قورویار.

قورخما الان آبانی تاپاریق، تله سیک دایانان اتورپوسلارا گؤز گزدیردیک لامصب هامیسی بیر قیلیق نظره گلیردی!

بیردن دالدن بیر #شاپالاق اندی بوینومون کؤکؤنه اوغلان مگه دیمه‌دیم ماشیندان ترپنمه؟!

شاپالاغا باخمایاراق دؤشه‌ندیم آنامین ال ایاغینا..

گئتدیک گئتدیک بیردن ایمامین قیزیل رنگلی گنبدلرینی گؤروب چیغیردیم: داداجان ایمامی گؤردوم، ایمام منه گؤز وورور.. منه گولور.. منی چاغیریر..

بیر هفته مشهدده اولمویان کئیف‌لره باخدیق، دفعه‌لرله زیارت ائتدیک، گزدیک دولاندیق، بازارلاریندا خرید ائتدیک، مسافیرخانادا یئییب ایچیب یاتدیق

من او بیر هفته‌ده ایماما، ایمام جا یالواردیم یاخاریدیم کی سن آللاه منی رسوا ائله‌مه!

سنی گؤرمه‌گه مجبور اولدوم یالان دانیشیم کارنامه‌نی #جعل_ائدیم آللاه منی ایماما گؤره باغیشلا..

هفته‌نین سونی ایمام‌دان ایجازه آلیب زنگانا طرف یوللاندیق

قوهوم قونشولار گلدیلر بیزی گؤرمه گه، هر شئی اوز قایداسیندا سئیر ائدیردی، بیر گون آللاه منی توتدو داییم گلدی بیزه. اونون آز چوخ کورا ساوادی واریدی

هر شئی‌دن دانیشیلدی بیردن دیلیم لال دئدیم:

– دایی جان من‌ده شاگیرد اول اولموشام – ماشاللا دایی جان کارنامه‌نی گتیر گؤروم

کارنامه لوووا گئتدی..

آباجانیم قاشیقی قویدو نفلی بوخارینین اوستونه، پول کیمی آغارمیش قاشیق بیردن باسیلدی سول الیمین اوستونه جیز جیز الیمین دریسی اتی یانیب کول اولدو..

سورا آنام اوتوروب آغلادی و یاراما چی #یئرآلما باغلادی

صاباح گئتدیم مدرسه‌یه اولاردا یالانیمی بیلیب الیمی آچیب پانسمان ائله دیلر.

مدرسه‌دن آیریلیب ائوه گله_گله اوز توتدوم غریب آقا ایمام ریضایا گیلئیلندیم آقاجان بس نیه بوجور؟

بیر آز اؤزومو دانلادیم و بیر آزدا آقادان کوسدوم سوراسی عیبی یوخ دییب بیرده اورگ ائویندن سسلندیم: آقاجان سنی آند وئریرم #حضرت_ابالفضلین دوشن قوللارینا منه یاردیم ائت درس خطینه گلیم

آقاجان من ایستیرم خلبان اولام

دوکتور، مهندیس، شاعیر، یازیچی و…

الیمدن یاپیش آقاجان

ال مندن اتک سندن